رواية معنى الحب أسماء شميس

أنا آسف
عادي مش مهم كلامك مش هيفرق وقعدتنا دي برضو مش هتفرق

بس هي فرقت معايا يا أمل مش ملاحظة حاجة
لأ مش ملاحظة
اسمك أمل وأنا اسمي منصف مش يمكن دي علامة!
مش بؤمن بالعلامات
لازم نؤمن بيها عشان نقدر نكمل وربنا مجمعناش صدفة كده وخلاص وأنا مؤمن إننا هنتجمع تاني ودي مش هتكون اخر مرة لو سمحت متقوليش لأ ادينا فرصة اديني فرصة أنصفك على الأقل وأدي لنفسك فرصة تكوني أملي اللي كنت بدور عليه ممكن
..
اعتبر سكوتك ده علامة رضا

بفكر..
وقررتي
اللي ربنا مقدره هو اللي هيكون
خير إن شاء الله
…..
بعد ما كلهم خرجوا من عندنا فضلت قاعدة في أوضتي بفكر في كلامه كله وردوده أكتر كلمة رنت جوا دماغي لازم نؤمن بالعلامات قومت اتوضيت ونمت وأنا عمالة أصلي على سيدنا النبي لحد ما عيني راحت في النوم وحلمت إني قاعدة في أوضة ضلمة ومش لاقية فيها لا نور ولا شباك ولا باب ببص لإيدي لاقيت معايا مفتاح فضة محفور عليه اسم النبي عليه الصلاة والسلام ركزت أكتر لاقيت باب قربت منه وبفتحه لاقيت الأوضة بقت كلها نور أبيض صحيت من النوم وآذان الفجر بيأذن والمؤذن

بيقول الصلاة خير من النوم استبشرت خير بالرؤية دي وقومت أصحي ماما وصلينا سوا وحكيت لها اللي شوفته في منامي استبشرت خير هي كمان وقالت لي صلي استخارة واللي فيه الخير هو اللي هيكون صليت الاستخارة ونمت صحيت الصبح أول ما صحيت مسكت تليفوني وفكيت البلوك اللي كنت عملاه لمنصف على الواتس وجهزت نفسي وفطرت مع ماما ونزلت الشغل طول اليوم ماغابش عن بالي لحظة وكل ما أبص في حتة أشوفه هو كنت حاسة إني محتاجة أشوفه واتكلم معاه كل شوية أبص لتليفوني مستنياه يتصل كنت حاسة إنه وحشني وإني أعرفه من زمان فات أسبوع من وقت ما شوفته كل مرة ماما تسألني عن رأيي أقول لها بفكر كنت خايفة إنه يخذلني مكنتش هقدر استحمل المرة دي معرفش ليه كنت خايفة بالشكل ده!

تاني يوم كلمت ماما وقولت لها تبلغ عمتو إني موافقة كانت الفرحة مش سيعاها واتخطبنا ٦شهور في ال ٦ شهور دي اكتشفت إن ممكن يكون لك توأم صورة طبق الأصل منك في أحلامك وحنيتك وتصرفاتك وردود أفعالك برغم إن طول عمركم اللي فات ده متقبلتوش ولا مرة بشكل يخليك تنبهر كل يوم كنت بكتشف حاجة في منصف تخليني أكمل معاه وأنا راضية ومبسوطة عن اختياري ولا لحظة معاه حسيت فيها إني خايفة من حاجة كنت دائما مطمنة في وجوده جنبي وحاسة إن ربنا راضي عني.
في لقاك.. الدنيا تجيني معاك.. ورضاها يبقى رضاك..

أمل أنا عايز أتجوزك الشهر الجاي
بس لسه فاضل كم شهر!
لأ عايزك معايا خلاص عايز أصحى وأنام وإنت في بيتي أنا أصلا صبرت ٦ شهور بالعافية هزوركم النهاردة مع ماما عشان نتفق موافقة
ماشي يا منصف موافقة مع السلامة.
..

وأتجوزنا أول حاجة قالها لي بعد ما دخلنا بيتنا صدمتني!
..
أمل ممكن أطلب منك طلب!
ايوه طبعا أكيد
عايز أشوف الحرق دلوقت حالا
خايف يكون شكله وحش ويكرهك في!
لأ طبعا خليني بس أشوفه ممكن
….
كنت خايفة وإيدي بترتعش دخلت الأوضة غيرت هدومي وخرجت وأنا لابسة بيجامة كان الحرق من

أول بطني لحد ركبتي اليمين أول ما منصف شافني قعد جنبي في الأرض وأنا واقفة ولاقيته قرب من الحرق وهو وبيبكي وأنا واقفة مذهولة ومش عارفة أنطق فجأة قام وقف وهو لسه بيبكي..
اتألمتي كل ده لوحدك أنا أسف بس كنت عايز أشكره حسيت إن الحرق ده ليه فضل علي لو مكنش حصلك مكنتش عرفتك ولا أتجوزتك يا أملي يا كل أملي في الحياة أنا آسف إنك عانيتي بالشكل ده وآسف إنك أتوجعتي وأنا مش معاك عشان أخفف عنك بس ربنا يقدرني وأعوضك عن كل شيء وجعك وكل شيء فقدتيه ربنا يقدرني وأكون منصفك وأمانك

إنت كده فعلا أنا اللي آسفة إني رفضتك في البداية مكنتش فاهمة ولا عارفة إنك قدر ربنا الحلو اللي كان متشال لي عشان يعوضني عن كل الوجع اللي شوفته في حياتي وصبري على كل حاجة شوفتها أنا بحبك يا منصف بحبك ونفسي ربنا يطول في عمري معاك عشان أفضل جنبك وأرضي ربنا وأتقيه فيك وتبقى منابي وجاري وجوزي في الجنة زي ما نولتك في الدنيا
أنا اللي بتمنى ربنا ما يحرمنيش منك ولا من طلتك اللي بتخلي قلبي يدق كل مرة كأني بشوفك لأول مرة ربنا يحليك في عنيا أكتر ما إنت حلوة عشان أنا مش هعرف أبص لواحدة غيرك يا أملي
…
فات شهر واتنين وتلاتة ولأول مرة أحس إن فيه جنة على الأرض كنت عايشة فيها مع منصف مسافر من أسبوعين في شغله والمفروض هشوفه النهاردة لاقيت تليفون البيت بيرن..
بيت البشمهندس منصف

ايوه
مين بيتكلم
أنا مراته مين اللي بيتصل
أنا.. أنا حاتم زميل منصف في الشغل هو
منصف حصل له حاجة
لا لا هو الحمدلله كويس في المستشفى دلوقت عربية الشغل عملت حادثة وهو كان راكب فيها وهو مروح
مستشفى إيه
مستشفى ….

…
قفلت معاه وأنا مش شايفة قدامي نزلت من البيت وأنا زي المجنونة من الصبح وأنا قلبي بيوجعني وجسمي كله كأني متكسرة وصلت المستشفى بعدها بحوالي ٣ ساعات سألت عنه في العناية المركزة بعدها بكم ساعة لاقيت الدكتور جاي بيكلم زمايله لاقيتهم بيشاوروا علي
مساء الخير يا مدام أنا الدكتور اللي بيتابع حالة جوز حضرتك الاستاذ منصف هو الحمدلله وظايف جسمه شغالة كويس وهنطمن عليه أكتر خلال ال ٢٤ ساعة الجاية لكن للأسف رجله اليمين أضررت جدا من الحادثة ومش هيقدر يمشي عليها تاني أبدا وحالته دلوقت بتتطلب بتر الفخذ لنهاية الساق وبعد كده هنحتاج معالجة نفسية وعلاج طبيعي بس بعد ما يفوق إن شاء الله المطلوب دلوقت من حضرتك إنك تمضي على أوراق عملية البتر عشان لازم العملية تتم النهاردة أنا عارف إن الموضوع صعب ومؤلم بس تأكدي إننا بذلنا مجهود خرافي عشان ننقذ حياته والحمدلله ربنا وفقنا هو كان واصل المستشفى والنبض واقف لو سمحتي فكري بهدوء بس حاولي متتأخريش لأن حياته في خطر وعنده نزيف داخلي ومحتاجين كل دقيقة بتروح مننا دلوقت مبنعملش فيها حاجة بعد إذنك..

مكنتش قادرة أفكر كان كل همي وقتها هو أزاي اتألم كل الألم ده لحد ما نبضه وقف حسيت إني عايزة أكلمه عايزة اكلم ربنا وقفت ممرضة وسألتها عن مكان أصلي فيه أخدتني أوضة في نهاية الدور وقالت لي بنصلي هنا اتوضيت ووقفت أصلي أول ما سجدت فضلت أبكي بحرقة وأنا بكلمه
لا يارب أكيد مخلتنيش أقابله وأعرفه وأحبه عشان تحرمني منه بعدها دا هو الإنسان الوحيد اللي نصفني يارب متحرمنيش منه واحفظه يارب قدرني أساعده وأكون أمله يارب متوجعش قلبي عليه بعد ما خلصت صلاة وخرجت لاقيت ماما وحماتي وعمتي وأخواته أول ما شوفت حماتي جريت عليه وأترميت في حـ,ـضنها وأنا ببكي
منصف يا ماما منصف
قولي يارب يا حبيبتي قولي يارب

يارب منصف يارب
..
بعد ما كلنا فكرنا وأخدنا القرار مضيت على الورقة أنا وأخو منصف كنت حاسة إن بقالي سنين مشفتهوش كأنه كابوس هقول له إيه لما يفوق!
كنت كل يوم واقفة قدامه بكلمه وبدع ربنا إنه يفوق وهو بخير فاق بعدها بخمس أيام كلهم دخلوا شافوه واطمنوا عليه إلا أنا كنت خايفة أبص في عنيه أقول له إيه أنا مضيت على ورقة عشان يقطعوا روحي فضلت خايفة أشوفه لحد ما هو طلب يشوفني
أملي وحشتيني كنتي فين
أنا كنت بصلي
ودعيت لي
لو مش هدع لك إنت هدع لمين!
أنا كويس صح! هبقى كويس وأعرف أمشي مش حاسس بجسمي من تحت وحاسس إن فيه تقل جامد علي
أصل رجلك الشمال في الجبس

آها عشان كده طب الحمدلله يعني اليمين كويسة! يبقى مش حاسس بيها من البنج
..
متبكيش يا أملي أنا الحمدلله بخير
الحمدلله إنك قدامي وشيفاك ربنا يحفظك لي إنت نعم الزوج ومشوفتش منك غير كل خير وتقوى وطاعة لله وعارفة إنك إنسان مؤمن وراضي بقضاء الله
الحمدلله ربنا يغفر لي بس بتقولي كده دلوقت ليه

عشان إنت مؤمن يا حبيبي والمؤمن مصاب ربنا إبتلاك في رجلك اليمين
إبتلاني ازاي أنا مش فاهم حاجة!
رجلك اتبترت
لا إنت بتهزري! أمل لا يا أمل
حبيبي أهدى قول إنا لله وإنا إليه راجعون
آاااااه يارب يارب الصبر إنا لله وإنا إليه راجعون
منصف أهدى يا حبيبي يا دكتور إلحقني يا دكتور حد يلحقني
…
يوم والتاني والتالت بياخد في مهدئات ولما فاق طلب يرجع البيت عند والدته في أوضته ومكنش

بيرضى يخلي حد يشوفه ولا حتى أنا
…
يا ماما عايزة أشوفه مش قادرة أتخيل إن بيني وبينه حيطة وباب وممنوعة إني أشوفه يا ماما أنا بدخل أشوفه وهو نايم زي الحرامية وأخرج قبل ما يصحى عايزة أشوفه هو بيعاقبني على إيه أنا مش قادرة استحمل عايزة اكلمه وأسمع صوته
يا ماماااااا
أيوه يا منصف جاية
أنا هدخل له خليك يا ماما
يا بنتي استني لما هو يطلب يشوفك
مش قادرة سامحيني