3 شهور فاتوا على طلاقي من زوجتي
اتجوزنا من 4 سنين، أول سنه كانت حب ودلع
بعدها الأمور بينا ساءت لما مخلفناش، روحنا كشفنا والدكتور طلب مننا تحاليل، والنتيجة طلعت أن مراتي مبتخلفش عندها مشكلة في الرحم. مصيبة كبيرة.. أنا بحبها بس في نفس الوقت عايز حتة عيل يشيل اسمي.. خصوصًا وإني مليش أخوات، أبويا مات من مدة وأمي عايشة مع خالتي بلد تانية. الخلافات زادت بيني وبين مراتي.. متحملتش طباعي اللي بقت صعبة
وطلبت الطلاق، مكنتش عايز الأمور توصل بينا لكدا، بس هي حست إني مبقتش أحبها زي الأول. انفصلنا من 3 شهور ورجعت تاني بعيش لوحدي في الشقة الإيجار اللي ساكن فيها من يوم جوازنا. فكرت أرجع البلد.. بس أمي كانت بتقولي: هترجع وتسيب شغلك ليه، هنا حال البلد واقف، خليك عندك.. ودور لك على عروسة تسعدك وتهنيك وتخلف لك العيل اللي نفسك فيه. بصراحة هي عندها حق.. أنا لازم أتجوّز وأعيش حياتي، خصوصًا وإني ماعنديش مشكلة في الإنجاب. إيه المانع؟
حبي لطليقتي مش لازم يوقف حياتي، الدنيا أصلاً مبتقفش على حد. في الشغل كان معايا وحدة عينها مني وبتشاغلني.. بس أنا كنت رافض أخون مراتي. وبعد ما عرفت إني أطلقت.. ابتدت تقرب مني أكتر وعرفت توقعني بطريقتها.. كانت طيبة معايا وبتسأل عني وبتهتم بيا جدًا. سألتني: سبب طلاقك إيه من مراتك؟ قولتلها إنها مكنتش بتخلف. قالت: أحسن إنك خلصت منها.. لازم تتجوّز وتِشيل ذريتك و يبقوا سندك لما تكبر وتعجز. بشوية دلع منها على حنية واهتمام.. طِبْت، و اتقدمت
لها واتجوزنا.. بس شرطت عليها متنزلش المصنع تاني.. مبحبش مراتي تشتغل، عايزها تبقى معززة مكرمة. قالت: أنا هنزل عشان أساعدك. قولتلها: لا.. هو أنا مش راجل ومش هعرف أكفّي بيتي ولا إيه؟ قالت: لا يا خويا أنت راجل طبعًا وسيد الرجالة.. أنت تؤمر. عشنا أول شهر جواز في سعادة وهنا، كانت بتعمل كل حاجة عشان تسعدني، بس بعد كدا كل دا اتغيّر.. وطلباتها زادت وبقت مصرّفة ومبذّرة قوي، زي ما تكون حالفة إنها متخليش قرش في جيبي. أنا نفسي أوفر و أعمل حاجة
للزمن خصوصًا لو ربنا كرمني وخلفت. اتعاتبنا واتخانقنا كتير.. بس مفيش فايدة. طلباتها مبتخلصش… لما لقيت إنه مفيش فايدة، اضطريت أشتغل على تاكس بعد الشغل عشان أحسن من دخلي وأقدر ألاحق على طلبات الهانم. فاتت سنة وبرضو مخلفتش.. وفي يوم قابلت طليقتي بالصدفة.. ولقيتها اتجوّزت وكمان حامل وعلى وش ولادة.. كنت هتجنن ساعتها وقولتلها: طب إزاي؟ قالت: ربك بقى لما يريد. كنت همــ . ــوت من القهر. طلقت الست اللي بحبها عشان مبتخلفش، واتجوزت من غيرها.. مطلعة عين أمي في مصاريف وطلبات مبتخلصش، وفي الآخر طليقتي تحمل وأنا لسة مخلفتش! طلعت زي المجــ .
ــنون على مركز العقم والولادة اللي عملت فيها التحاليل، ولما قابلت الدكتور وطلبت منه يفسر لي اللي حصل، بص في التحاليل الخاصة
بيا ودخل بياناتي ع الكمبيوتر وقالي: هو أنت يا راجل.. دا إحنا لينا أكتر من سنة بنحاول نوصلك. قولتله: ليه يا دكتور خير!! قالي: الحقيقة مش عارف أقولك إيه؟ قولتله: في إيه بس طمني؟ قالي: أنا آسف جدًا.. بس البنت المختصة بأخد العينات.. اتلخبطت و بدّلت العينة بتاعتك أنت و زوجتك مع حد تاني؟ قولتله: يعني إيه مش فاهم. قالي: إحنا وقتها حاولنا نكلمك على الرقم المسجل عندنا.. بس للأسف موبايلك كان مقفول. افتكرت يومها.. إننا لما رجعنا من هناك وعرفت إن العيب منها مش
مني، دبّيت معاها خناقة كبيرة.. ومن عصبيتي كسّرت الفون ميت حتة… ولما حبيت أستبدل الخط بعدها اكتشفت إنه مش متسجل باسمي فاضطريت أشتري خط جديد. سألني: في حاجة حضرتك؟ قولتله: لا مفيش.. فعلًا أنا غيّرت الرقم بعدها. قالي: طيب إحنا آسفين جدًا.. دي نتيجة تحاليل حضرتك أنت المدام.
رجعت البيت وأنا مش شايف قدامي وحسيت إني ظلــ . ــمتها معايا.. وإد إيه أنا ندمان، بس خلاص وقت الندم فات. بعد كام يوم كنت راجع هلكان بالليل من التاكسي.. لقيت مراتي بتقولي: أنا عاوزة هدية حلوة بقى. قولت لها: ليه يا ستي عيد ميلادك
لسة كان من شهرين! ولا يمكن عشان سبوع ابن بنت خالتك؟ ما أنا عارف مناسباتكم مبتخلصش. قالت: كدا برضه. طب أنا زعلت.. ومش هقولك ع الخبر الحلو. قولت لها: خبر حلو.. لا قولي ولو يستاهل هجبلك هدية. قالت: كلها 9 شهور وولي العهد هيشرّف؟ قولت لها: إيه!! أنتي بتتكلمي جد. قالت: أيوة يا حبيبي جد طبعًا. قولت: يااااه أخيرًا.. وفي عز فرحتي سكت فجأة لما افتكرت كلام الدكتور وهو بيقولي: دي نتيجة تحليل حضرتك والمدام.. المدام سليمة ومفيش عندها أي مشكلة خالص.. بس المشكلة عندك أنت للأسف.. حالة عقم نادرة من الصعب العلاج منها. نادتني: حبيبي!! مالك سكت ليه.
حبيبي مالك!
ها.. لا مفيش أنا بس بفكر في هدية عمرك ما تتوقعيها.
وكملت في سري: “هدية هتنهي عمرك بدون ما آخد فيكي ساعة سجــ . ــن واحدة”.
طيب قولي إيه الهدية بقى.
لا خليها لوقتها أحسن.
ليه بس؟
عايز أفاجئك بيها.
يا حبيبي.. ربنا يخليك ليا وميحرمنيش منك أبدًا.
ويخليكي ليا يا روحي.
قوليلي بقى.. لو ولد هنسميه إيه ولو بنت هنسميها إيه؟
امم.. اختاري أنتي يا روحي أنا واثق في ذوقك.
امممم.. لو بنت هتبقى فريدة.. إيه رأيك؟
جميل.. طب ولو ولد.
لو ولد ممكن نسميه حازم!!
جميل اسم حازم.
يعني موافق.
قولت جوايا: أكيد حازم دا عشيقك وعايزة الولد يبقى على اسمه.
إيه مالك سكت ليه؟
لا مفيش.. موافق على الاسم جميل زيك يا روحي. أنا هنام دلوقتي عشان راجع هلكان.. تصبحي على خير.
إيه دا.. مش هتاكل طيب؟ لا.. الفرحة خلتني شبعان كأني واكل ديك رومي.
طيب يا حبيبي على راحتك.
